يا بو جميل
2026.05.19
أسعد السبعلي
يا بو جميل، هجرك على كتافي جبل!
من وصلت المكتوب، جاوب بالعَجل..
عيني اليمين.. رفّت مبارح مرتين
قلبي انتعب من يمّك وفكري انشغل!
وهالقلب يلي عالنوى تألم وداب
مرّ الحياة وحلوها بيشاطرك..
باعت إلك شوقي وحنيني بهالكتاب
وعن ضيعتك أخبار تعجب خاطرك..
دغوش الدني لمّام بالضيعه مرق
عطيناه لمن قلّنا الدير انسرق!
وحامل صور مار جريس عليه السلام
وهالجمّعن كلّن شرب فيهن عرق...
وحنا لزملو دم وقت اللي انضرب
وللتضحيه كانت دموعو كافيي..
قلنا لخيو، شمّع الخيط وهرب،
نقلت من صدري لصدرو العافيي!
حنا شفي، قصدتو عا خدمه مبارحا
يمهمد معي البيدر، تغيّر وانقلب..
تخلّق بوجهي، وقال كلمه جارحه
لو فيك دمّ.. ما طلبت مني هالطلب..
مبارح نزل "عالبوسطه" يوسف بشير
رزمه من النايُرك ودتلّو -- هدى..
شب طول الرمح، جرّصنا المدير
قلّو: بصملي هَون.. والرزمه خدا..
ولحود حامل فرد، طرّه نقشتو..
مرقت الدوريه عا غفله وكمشتو..
بالحبس دغري ما توسطلو حدا
وما حلّها بالحبس تبرد فرشتو...
وبيت العتابا نظم قوّال الغريب..
ما نام حتى تلّتو عمّك نجيب
وعينك تشوف الكَيف لمن تلّتو
وأكتر من الكل كيّف بو حبيب!
ومن فرحتو فكّ "التني" عن معلفو
وكان اندبح لو ما نجيب يحلّفو..
وبلش يقلّو هَيك بيردّو الجواب
هالبيت افلاطون ما بيألّفو!
وبو الياس، إم الياس صارت تسألو
عن افلاطون من وين؟ قلا بجهلو..
بيكون شي قوّال شاطر يا مرا
بيرصد قوافي طيّبه وصوتو حلو...
سألتني بهالحرب كيف عايش خليل
-- لابسلك عوينات من جنس التقيل..
وفسطان مرتو بيشتري رزقاتنا
انفهمت القصّه.. لفّها يا بو جميل!
بتعرف حلا؟ ست المحاسن والحلا
راق الزمان والهمّ عن قلبا انجلى..
جوزا من "النايُرك" باعت بولصا
ومين بعد بيقدر يحاكي حلا...
غارت حليمه من حلا، وجوزا اشتلق
باع بيعه معجّلي طلعت غَلق..
باع جلّ العين هالتحت القبو
تا جبلها لمرتو مباريم وحلق...
ويوسف بو مرعي بهالقبو عندو جلال
مهتري وشي ألف رقعه مرقّعو..
اشتلقو عليه الظاهر ولاد الحلال
راح الجلال، وراحت الدَكّي معو!
ومكتوب ما استلمت بنت خالك وداد
من يومة اللي راح جوزا من البلاد..
وعندا اسمالله ولاد بدهن مطحني
شو قصتو؟ عا مين تارك هالولاد؟
يا بو جميل نعست، قاتلني التعب
بوسه بهالمكتوب فيها بودّعك..
"ترمّسو" ديّي ع تشقيف الحطب
لا تلومني ان قصّرت هالمره معك!