(حلفت سيسبان بشيبة بيها، وبغربة خيها، ما بتنزل عالرقصة حتى سمّعها أبيات تخلي خصرها يجنّ.. والقصب يغنّي منّو لحالو..!)

"نحنا الصبايا، السحر بعينينا

القمر عم يحكي للنجمه علينا..

وعا مرج الهوى، لمّن طلينا

فتّح عا إمّو زهر الليمونا..

حلوين الضيعه، عالضيعه طلّو

المجروح بقلبو، منهُن يا دلّو!

حاجي بهوانا، حاجي تتسلّو

نحنا نسيناكُن، ليش ما بتنسونا؟

يا قلبي تهدّا ، يا قلبي تهدّا

جروحك داريها، ما بقى بدّا..

ما شفتك طالع هالحمله قَدّا

راحو الحبايب، راحو وتركونا!

عيون الدبّاحه، كيف بداريها؟

وعم تجرح قلب المتولّع فيها..

خلّيها الغصّه، بقلبك خلّيها

ياما بالماضي عيونك جرحونا!"

....

أسعد السبعلي من ديوان "منجيرة الراعي"

وفي الصورة من ساحة سبعل، السبعلي من حجر سبعل.