من "يا بو جميل" أيضاً وأيضاً
2026.07.09
أسعد السبعلي
"مكتوبك لأمك وصل يا بو جميل
دقت علينا الباب وبوجّا حكي
دموع الفرح عا خدودها صارت تسيل
ويمكن نزل من عينها جرّة بكي..
قريتو، وإمك عبّت الأوضه نهيد
وكل كلمه تقول: دخلك عيدها..
اضحك وإرجع للقرايه من جديد
وهالمحرمي تعصر دموع بإيدها!
ونخّت ع ادني وشوشتني عالهدا..
قال: ليش عمّك ما ذكرتو بالسلام..
خايفي لا يروح يحكيلو حدا
ويحطهّن تحت العتوبه والملام..
وجّ السما تغيّر، تلتّم بالغضب
وهالدوالي الريح رجّفها قصب!
وسترة العنقود شرمّها الهوا
ولو ما تشتّي راح ضيعان التعب..
بعلمك الدنيي هاديه بلمحة بصر
من بوز عدلي الطَوف عالأرض انهدر..
وصار هالقرميد طاير بالفلا
جنون الهوا من مطرحو قام الحجر!
غلبنا إبن خالك سليم نفهّمو
يلّم عقل، يطيع بيّو ويخدمو..
خالك حلف ان ضل يلعب بالقمار
من البيت والرزقات بدو يحرمو..
في أرملي بالسر حلفتلي يمين
غير الله بهالدني ملها معين..
ذكرها بشي قرشين الله يوفقك
هالأرملي العندا ولاد زغيّرين..
كان القمر خسفان نتفه بالفلك
والعين دور "التك" صارت تقشعو..
وهالولاد يحرتقولو بالتنك
من الحوت، خافو عالقمر لا يبلعو!
وسالم الطحّان عينك تقشعو
شندف هالمهدّي، ووقّف مقلعو..
أركيلتو مش قصد كسرتها المرا
قام القيامه مقبّعه الشغله معو..
وبخبّرك سعدى بنت يوسف شديد
هلي ربط للضبع راجي خيّها
معلّمي رقص الفرنجي من جديد
والله يساعد إمها من بيّها..
وحاجي تقلّي ديب رسمالو قوي
يخجل بقا.. وهالوعد حلّو يستوي..
طربوش بيّو طايرا شرّابتو
مجعلك، مزفّت، ما بقا يحمل كوي!
وعالمخترا فارس نوي من جمعتين
قال كيف قلو نمر ما بيشوفها..
حطّن بهالميزان طلعو وقّتين
ليرات صفرا كارجي عا حروفها..
شرّف بعد سنتين عالضيعه جليل
وبلّش الغربه يزمّ تمّو ويوصفا..
صار يخلط بالحكي يا بو جميل
ودرب بيتو منين؟ ما عاد يعرفا!
وعنّا عريشه مطعّما عمك رشيد
هالسني تقلت على عواميدها..
عملنالها عالمصطبي خيمة حديد
ورطل طابش أزغر عناقيدها..
وطالع إشاعه عندكن، جوزا لوداد
موالف مرا بالسر.. من أهل البلاد
من خصوص مرتو هالخبر كنّو صحيح
رح تتركو وتطلع الفلّه بهالولاد!
وطنوس بعدا خصلتو.. ما أبشعا..
شيبتو تخمين مش عم يقشعا..
صار هرش وما بقا يرحلو الدلع..
وكل ما مرقت مرا بيمزح معا!
تامر وصل.. والشيخ عزمو عالغدا
انعجقت الضيعه بهالبويك الجايبو
ومنعرفو مقطوع ما عندو حدا..
لمن رجع زنكيل كترو قرايبو..
في بعد عندي خبار بكرا بكفيّا
نادر - بنت وردان - عم بيحاكيا
هلق نوي يحط العلاقه برقبتو
ورايحين اليوم نحكيلو فيا..."