تصعيد أمريكي - قطري في سوريا

 كيفورك الماسيان ـ برلين
بعرف أنه الجزء الأكبر من الشعب السوري في الداخل تعبان وعم يركض كل يوم ورا لقمة عيشه وبعرف قديش الحكومة السورية مقصرة مع الناس وكأنها عم تعصر ليمون على الجرح وبعرف قديش نحن مقصرين مع أهل الشهيد والجرحى.
انتوا صرتوا تعرفوني منيح من أول يوم للحرب.. في شي يوم كذبت عليكم؟ يمكن في شي ما كتبت عنه بس لما كتبت في شي مرة كذبت؟
طيب، خلونا نبلش من هالنقطة ألا وهي الصدق واليوم بدي كون معكم صريح مثل عادتي وأدعو الناس داخل البلد إلى عدم السماع لأخوات الـ شو أسمه اللي قاعدين في قصورهم العاجية في برلين وباريس والدوحة واستنبول،،،
اليوم بدي اطلب من الناس المقهورة جوا البلد أنو يبرموا دعوات الاحتجاج في الشارع في رأسهم والتفكير فيا وبتوقيتها وتداعياتها الحتمية وبعدين قرروا اذا بدكن تنزلوا عالشارع أو لا.
أصدقائي، منذ وصول جو بايدن إلى الحكم، كان التوجه العام عند الإدارة الأمريكية أنو سوريا أصحبت ضعيفة ومفككة الأوصال لهيك ما في داعي يكون ملف سوريا على قائمة الأولويات. من هون دخلت عدد من الدول مثل الامارات ومصر والبحرين ومن خلفهم السعودية في خط المصالحة مع سوريا. هذا التقارب دق ناقوس الخطر عند قطر واسرائيل وتركيا، وبلشوا منذ أشهر بالضغط على واشنطن ورسائل ورا رسائل لإدارة بايدن بفرض عقوبات أكثر على الشعب السوري واذا بدنا نشوف القائمين خلف هذا الضغط هم بالتحديد اللوبي الاسرائيلي وقطر.
قبل ايام صنفت إدارة بايدن قطر "حليف أساسي خارج الناتو" وبمحض الصدفة اجتمعت عملاء قطر التي تدعو نفسها "المعارضة السورية" في قطر بعد أيام من هذا التصنيف واتفقوا جميعا على التصعيد. والتصعيد هون هو الدعوة إلى التظاهر في الشارع وفي أماكن محددة..
ليش؟
-اسرائيل وقطر غير مرتاحين لجهود الإمارات لإنهاء الأزمة السورية.
-سوريا لم ولن تقبل بالفدرالية وتغيير الدستور ولذلك التركيز على السويداء التي كانت ومازالت حلم اسرائيل بـ"منطقة عازلة" بين الجولان المحتل وأقرب نقطة للجيش السوري. هذا التصعيد هدفه واضح، تقسيم أمر الواقع في السويداء وشرق الفرات.
نعم، نحن لم نربح المعركة بعد ولكن الأمريكي والاسرائيلي لم ينتصروا أيضاً.. لذلك يحاولون الاَن اخضاعنا واخضاع البلد.
النزول إلى الشارع هو حق ولكن اسأل نفسك: هل نزولك إلى الشارع والاحتجاج سيغير من الوضع بشكل جذري؟ سوريا خسرت أكثر من 100 مليار دولار من عائدات النفط بسبب الحرب.. بتعرفوا شو يعني 100 مليار دولار؟ بتعرفوا أنه البنية التحتية للبلد متهالكة بسبب 11 سنة حرب؟ بتعرفوا أنه سوريا تحت عقوبات وحشية؟ الحكومة السورية مقصرة بس السبب الأساسي هو الحرب وتبعاته.. أنا كنت عبي لتر المازوت بـ 9 ليرات قبل الحرب. بتتذكروا هديك الأيام؟ طبعا ما رح نرجع لهدوليك الأيام بس نحن فينا سوا نحسن البلد شوي شوي ونخليها قوية في الداخل والخارج.
اليوم أدعو الشباب والصبايا بعدم السماع لأخوات الـ شو أسمه من قصورهم العاجية في عواصم العالم. لا تسمعوا لأخو شو أسمه قاعد ورا لابتوب الاَبل تبعه واَيفون 13 طالع ببث مباشر عم يدعي الناس عالتظاهر. بتعرفوا أنه هدول ما رح يتأثروا بأي شي ممكن يصير فينا بالبلد صح؟ بتعرفوا أنه هدول عاملين مصاري خيرات الله من ورا وجعكم ما؟ بتعرفوا أنه هدول ما همن البلد ما؟ ولك بتعرفوا أنه في ابن شو أسمه بيقول عن سوريا "مو بلدي" ويدعو إلى نقل اَثار سوريا إلى أوروبا ويُعرف نفسه بـ "فغنسي من أصول سورية" وهلئ جاية عم يطلب من الناس تتظاهر؟ هدول أحقر بني البشر. لا تسمعوهم لأن اللي عم يعملوه اليوم رح يؤدي إلى موجة جديدة من اللجوء والنزوح والتناحر ومع أول رصاصة طايشة رح تصير دم وانتقام والدم رح يجرنا إلى انتهاء سوريا من الوجود بشكل كامل.
اللهم إني بلغت اللهم فاشهد