دني مسودّة
2022.02.03
محمد قرفول- فينكس:
شو بخبرك يا دنيتي وقلك
ما في حدا بتصفي إلو مدة
كلما بفكر يوم أوصلّك
انتي طلوع طلوع بتشدي
لو توقفي شي يوم بمحلك
تا اسألك إنْ كان بتردي
شو بعد بدك خير أعملك
ليش الأسى لاطي ورا ظلك
وليش السما بتضل مسودّة؟!
تا تضحكي يا دنيتي حلك
وكل الحبايب أقشعن حدي
رشّي على دروبي عطر فلك
وابقى متل عصفور ترغلك
مدّي غصونك حب ومودة
يا دنيتي شو مكرهك فيي
زغار كنا شي رحل بيي
راحت علينا كوام حنيّة/ي
وما نمت يوم مليح عَ.مخدة
كانت سنين مغمسة بالدم
ولا يوم نغفى ولا يبات الهم
كان عنا وطن اسمو ام
بحب يجمعنا وقت شدّة
واليوم متلي كتار بَيُّنْ راح
ضحى بدمو ت.الوطن يرتاح
الهم عن صدرن ما راح ينزاح
سلال الإعانة ما بقى تقدّي
لغيتو البطاقة وزادت الشدّة..!