(من رسائل يا بو جميل، حلقة مليئة بالعاطفة والحزن على صنوبرة البيت التي اقتلعتها الريح في ليلة غضب..)

"يا بو جميل مع هالطيور الطايرين

حمّلت هالكتوب لعيونك حنين..

دابت عيوني وحنّ قلبي لطلّتك

متل ما بيحنّ للبيت السجين!

بتكون قلت.. تعوّق عليك الجواب

ولمن بتعرف شو جرى بتنسى العتاب

هبّات نار القلب خايف تحرقك

دير بالك بس تفتح هالكتاب!

شو بخبّرك جفني بكي، قلبي بكي

بساعة جنون الريح طيّر مملكي..

تاريخ ضيعتنا اختفى بلمحة بصر

ومها حكيت الشوف مش متل الحكي...

بعدك بتذكر.. كان عنّا صنوبرا

تحت القبو المسنود سطحو بقنطرا

الشمس كانت تبرد بفيّاتها

ومن كعبها عمر الزمان بينقرا..

لجدايلا هالخضر شو ضحكت عيون

مين قال هالمجد العريق بينحني؟

هبّت عليها عاصفه بساعة جنون

وغاب أحلى كتاب من عمر الدني

صحبه قديمه بينها وبين القمر

وأحلام وحكايات، بينو وبينها

بهالليل ضايع بعدها رفيق السهر

رفيقتو ما عاد يعرف وينها!

شو تعيّن نواطير تحت غصونها

وشو انحلّت مشاكل بيصعب حلّها

محكمي كان العدل قانونها

ودستورها مرجع الضيعه كلّها...

ضيعانها شمسيّة البيت العتيق

الكانت تردّ الريح، وترّد الحريق

من بعدها رفوف الطيور تفرّقو

ما عاد الهن صوب ضيعتنا طريق!

يا غبنها ضيعان طلّتها تغيب

الأخدت معا سر الحبيبه والحبيب

كانت لكل الناس تفتح صدرها

وقاطعه بنفحاتها رزق الطبيب!

لمن تعبّت هالرياح بعبّها

وصارت تهزّا وتفلشا وتضبّها

تذكرت ساعة موتها قول المتل:

ما في ولا سجرا بتلحق ربّها!

هالقلعة اللي فروعها لحقو السحاب

شو تكبّرت ، والكبريا الها عقاب..

هالكانت تبوّس جدايلها النجوم

غصب عنها الريح بوّسها التراب..

راحت البيني وبينها حكاية وفا

الكانت لعمري كتاب ولشعري دفا..

قلبي انكسر ع غيابها يا بو جميل

وقنديل أحلى حلم عتّم وانطفى..

لطلّتك يا بو جميل الشوق زاد

بلّغ سلامي لبنت عمّك والولاد

انشالله الجمعه القادمه بكتب إلك

من بعد ما منكون فكّينا الحداد!"

....