كنزة/ت الحمرا
2022.01.29
محمد قرفول- فينكس:
يا كنزة/ت الحمرا ليش خجلانة
بعدو الهوى بعمرا طايف بالغناني
وبعدو الصبح بيفيق يفطر حلا عالريق
من خدود دفيانة
وشفاف تسقيه الندي خمرة
يا كنزة الحمرا
كلما السمرة تِلبِسك
بزرار فلة تحبِسك
وشعرا الأسود يلمِسك
تدوبي على السمرة
وتْدّوبي الحمرة على جسما الندي
والكرز يستنفر جنونو ما هدي
انتي على تلوج الصدر رح تجمدي
ومن غيرتو قلبي شعل جمرة
تمنيت لو يتقطّعو زرارِك
رح يحترق هالقلب بِنارِك
وكلما يا روحي ينقطع شي زر
ويضيع تحت التلج متل السر
دوّر عليه واكشف سرارِك
واسرق من كنوز الحلا غمرة
يا كنزة الحمرا..