مكتوب للحملاوي
2026.04.20
أسعد السبعلي
(لمن إجا عا بيروت من بعد سفرتو عالبرازيل، طوّل شوي الشاعر طانيوس الحملاوي على زيارة رفيقو السبعلي بسبعل..)
"عالوصلي كنت ناوي
تزور خيّك تا يتهنّى
شو السبب يا حملاوي
جيت وما جيت لعنّا؟
عم تسألني الضيعه عليك
ليش مطنّش عنها هيك..
وسطيحتنا مشتاقه
بدّا بوسه من عينيك!
أوعا تجي عا غفلي
يلي عا اسمك حنّيت
بدنا نعملّك حفله
ونوّرلك سطح البيت..
لا تحتجّ، الطقس منيح
وأسعد بيهمّك أمرو
وهالديك البيضلّ يصيح
بدّي اقصفلك عمرو!
عجّل تبقى بالمشوار
محسوبك ناطر عا نار
حتى يقولو بضيعتنا
سبّق عا ترمو نوّار..
يلي هالقلب احتلّيت
شرّف تا نصير ضيوفك
في عِنّا صوره بالبيت
بتحكي لمّن بتشوفك..
صورة (مير) القوافي
سليم لطف الله الحساس
شاعر كلّو ظرافي
وشو بتحبّو قلوب الناس!
خيّك في عندو عرزال
شو حنّتلك فيّاتو..
حد منو بيبكي شلال
متل العسل ميّاتو..
بتغفى عا نغمة عصفور
لبناني ريشاتو زغار
بتوعى عا صرخة معدور
من مقلعجي زندو نار!
بتغطّيك السما بشال
جايي من دنيا بعيدي
وبتنقز عا صوت حجال
جوانحهن لون نبيدي..
وعالتلّه الحدّك بتلوح
بتسهر نجمه مقابيلك
والبدر بيجي وبيروح
بعينو الحلوه بيوميلك..
الضيعه زعلاني منّك
مشتاقه لبسمة سنّك
ما عاد فيها الفرقه تطيق
كتير بتسألني عنّك..."
....
أسعد السبعلي، نقلة كنار..
والصورة للحملاوي في زيارة للسبعلي، تعود الى التسعينيات..