الأديب السوري مفيد أحمد يحصد المركز الأول في جائزة «وولت ويتمان» الدولية بقصة تجسد جراح الإنسان بعد الحرب
2026.06.18
2026.02.18
أسعد السبعلي
....بيتنا المهجور....
طال النوى يا بيتنا المهجور
قلبي بعطر محبّتك مغمور
قولك بتجمع شملنا الإيام
ومنعود ناكل خبز عالتنور؟
وهالقال فيها شعر "لامارتين"
اشتقنا على نسماتها الحلوين
وهاك الشفق عا مطل قنوبين
قديش صفرنْ عا تلالو نسور!
اشتقنا لضيعه ترابها ريحان
عا مرجها الأخضر ولِد نيسان
للحق مرجع، للوفا عنوان
بالخير بيدر عزّها مغمور..
وطل القمر عا كتف هالتلّي
وقديش فيها سحر هالطلّي
وإم أسعد للسما تصلّي
ومعها يصلّي المسبحه العصفور...
....
أسعد السبعلي، من ديوانه طل الصباح..
والصورة من سطيحة الشاعر في سبعل..
*****
... برد يختي...
"برد يختي.. تلفلفي بهالشال!
التلج صار جبال فوق جبال!
الريح عم يصفُر،
والرعد عم يهدُر..
والغيم جايي بالسما خيّال!
النار بردِت.. والحجر بردان!
والطير من شرد الهوا هربان!
البيت رح بيطير،
والخيمة العالبير
عملِت بقلبا العاصفه ميدان!
وصنوبره، صار الزمن ختيار..
وبعدا صبيّه بتلفت الأنظار..
الريح زنّرها،
من الأرض طيّرها
وإخدت بدربا لوزتين كبار!
وبيوتنا صارت متل برّا
والدني عالفل تتمرّا..
البرق عم يضوي،
والرعد عم يدوي..
وغمّض عيونو الجو بالمرّا!"
....
أسعد السبعلي، من ديوان منجيرة الراعي
