همسِك وحي
2025.10.21
محمد قرفول
قبل ما تيْبَسْ غصوني النديي
ع باب القلب دقتلي صبية
قالت جيت منك غزل اسمع
لوجه الله، لا تبخل عليي
جايي ومطمعي منك بمطلع
يرجّع لون ورداتي الشهيي
غمار من البنفسج جيت اجمع
وعطرو ندي ساكب عا يديي
انا بعشق حروفك شي بتطلع
نغم من روح حساسة ووفيي
نبع من جرح عم يبكي توجّع
نزلت دمعتو شلال ميي
الورد يشرب من جروحي ما يشبع
ودمعي يسكب وقلّو خطيي
اتركو تا يرتوي مش حق يرجع
قبل ما يشرب عطوري الذكيي
اتركو تا يرتوي من جرح دمّع
ويطفي نار شوقو العاطفيي
دخلتي ع القلب من باب اوسع
من حدود السما الزرقة العليي
وفاض الشعر والافكار تلمع
قصايد فوق روحي مندريي
وصرتي ترددي حروفي واسمع
ببحة صوتك الدافي استمتع
وانتي تسكبي وحيّك عليي..!