حنين
2025.07.08
محمد حسن حسن
يا ستي الطبخة ردي
وعلى هالأرض مدي
عطيني من إبدك شدوق
وتعالي قعدي حدي
يا ستي جيبي المحريك
وشوفيلي وين راح الديك
بلكي تساوي منو فريك
وبلكي جدي بتغدي
يا ستي محلا الصفوات
يلي احترقو من الجمرات
قولي تيعا للجيجات
بلكي العصفور بيهدّي
يا ستي خضّي الخضا
ونادي بصوتك لفضة
بحضك يا ستي و بحضا
كيلو بتطالع زبدي
يا ستي هاتي هنهوني
من صوتك شو حنوني
ودلعونا و على الميجوني
مني أوف و منك ردي
يا ستي بعدك شو صار
صار البيت كوم حجار
ما ضل غير التذكار
وآهات الليل البتودي