تذكّر ياسمير الليل (زجل.. قصيد)
2024.05.01
علم عبد اللطيف- فينكس
تذكّر يا سمير الليل
أكترْ
بلكي الذاكرة تجْبُر
مْكسّرْ
وشيل الروح ع كفّك
وداوي
كسور القلب جوّاتك
ت تِجْبَرْ
بعدو القلب عاشق حلم
غاوي
حلم ال رافقَك صدِّق
ماقصّرْ
بعدو اليوم ع الصبوات
ناوي
وبعدو كتير متمنّي
يْزهّرْ
وعارف ب مشيبو شو
يساوي
قال العمر يمكن صار
أقصر
وقال القلب... مانسيتا
بلاوي
وقال الحلم بعدي اليوم
بِذْكُر
ليالي ما حوتني طفل هاوي
وما بنسى من الغلاوة شوق
أشّر
لهاك القلب.. خلّي القلب
طاوي
عذاب وشوق.. لو أنّو
تمرمر
وقول الحلم شفتو كان
راوي
حكاية عمر.. شكلو كان
أشقر
طفل زغير صوتو اليوم
داوي
لنص الدرب.. لاقيلو
تايكبر
ويعطي العمر من عندو
شقاوي
يمكن لو نسيتو اليوم
تخسر
ويمكن لو حضنتو ب حفاوي
يبقى رْفيق ايامك
ويشكر
زمان اللي التقيتو
حلم واعد
وسوا بتشيّعوا...
راحل مْعتّر.