الشاعر ميخائيل عيد (مشتى الحلو)
2024.04.26
د. جودت ابراهيم
* ولد في مشتى الحلو عام 1936
* خريج أكاديمية العلوم السياسية والفلسفية في صوفيا بلغاريا، عمل في البناء، وفي الكثير من الحرف والمهن المعروفة، ثم درًس في الثانويات الخاصة (الأدب العربي)، ثم عمل رئيساً لتحرير مجلة الطريق إلى الاشتراكية - القسم العربي على مدى ثلاثة وعشرين عاماً، وقد عمل مدققا لغويا في إحدى دور النشر.
* كتب الشعر والمقالة والزجل.
* قلد وسام جمهورية بلغاريا الشعبية ووسام الشاعر البلغاري بيو يافروف تقديراً للجهود التي قام بها في ترجمة مجموعة كبيرة من الأثار الأدبية البلغارية إلى اللغة العربية.
* انتخب عضواً في المكتب التنفيذي لاتحاد الكتاب العرب في سورية لأربع دورات متتالية.
* توفي في 16 /12/ 2004
مؤلفاته:
1 ـ حكايات وغناني ـ زجل ـ دمشق 1970.
2 ـ سفر ـ شعر ـ دمشق 1977.
3 ـ المزمار القصبي ـ قصص للفتيان ـ دمشق 1979.
4 ـ ورقات من دفتر عمر ـ زجل ـ دمشق 1980.
5 ـ أغنيات لقمر الطفولة ـ شعر ـ اتحاد الكتاب دمشق 1984.
6 ـ قمر المخيم لا يساوم ـ شعر ـ دار الشيخ ـ دمشق 1988.
7 ـ تنويعات على وتر الحلم ـ شعر ـ اتحاد الكتاب العرب بدمشق 1988.
8 ـ وردة الطقس البارد ـ شعر ـ اتحاد الكتاب العرب بدمشق 1989.
9- رماد الأحزان- شعر- اتخاد الكتاب العرب 1992.
10 ـ غزالة النهار ـ شعر ـ وزارة الثقافة بدمشق 1993.
11 ـ خطرات ورؤى ـ شعر ـ اتحاد الكتاب العرب بدمشق 1994.
12 ـ أسئلة الحداثة بين الواقع والشطح ـ دراسة ـ اتحاد الكتاب العرب بدمشق 1998.
13 ـ وجوه ومرايا ـ دراسة ـ اتحاد الكتاب العرب بدمشق 1999.
14 ـ إشارات وأصداء ـ اتحاد الكتاب العرب بدمشق 2000.
15 ـ ورود وسنديان ـ زَجَل ـ دمشق 2000.
16 ـ النمل الغني ـ قصص ومسرحيات للأطفال ـ وزارة الثقافة ـ 2000.
17- يمامة الكلام - شعر- وزارة الثقافة- 2000..
18- دروب- شعر- وزارة الثقافة- 2007
وله عشرات الكتب المترجمة عن اللغة البلغارية والكثير من المقالات الصحفية...
...
ومن شعره الشعبي:
المشتى
المشتى يا أجمل صورة بتخطر ع البال
يا غنية مسحورة. ع كتاف تلال
*
مروجا فتانة خضرا. وسهراتا كيف
وبجرود العز السمرا. ما أحلى الصيف
ومية انهارا خمرا. لو زارا ضيف
بيسكر من أول نظرا. وهالسكر حلال
*
السحر بواديها تربى. واخضروا غصون
مفتونة خلقة ربا. والسحر فنون
ضيعتنا البلبل حبا. وقال الحسون
دلبتنا غافي بعبا. سر الأجيال
*
انوقفت قبال الدلبي. وشوهرت لفوق
بتحس بقلبك رهبي. وبعيونك شوق
ومع نسمة هوا غربي. بتشوف عروق
دلبتنا ترش محبي. ورفات ظلال
*
النسمة تغط بواديها. وبالعطر تطير
تلاعب روس روابيها. وكتاف الشير
ومع نغمات سواقيها.
جوق عصافير
يغني يتغزل فيها.
ويغمى الشلال
*
حفافي خضرا حلياني. مغمورة بضو
بعطر زهورا النشواني.
مليان الجو
سواقي، بلابل، وغناني.
ويا عاشق لو
بتشوف السحر الانساني.
ع خصر وشال
*
ولشمال شوي مغارا.
صيتا مشهور
لو بتقصدها بزيارا.
بترجع مبهور
روعة ورهبة بأسرارا. ودهور دهور
مصلوبة فوق حجارة. وجموح خيال
من ديوان حكايات وغناني.. ميخائيل عيد
***
لما خيالك مرق
مرمغ شفافه الضو. بالوردة الجوري
قالت النحلة ولو.
غاير من الدوري
* * *
ولما خيالك مرق.
في كوكبة أحلام
فرفد وراقه الحبق. وتنهد النمنام
* * *
وبفية الهدبين. هالسوسن الغافي
عم يغمزن ع مين.
عينيي وشفافي؟
* * *
وقلك :تعي تانطير.
وأفرد لك جناحي
يا وهج حلم صغير. متشلعه رياحي!
* * *
وتطلع ضبابة نور.
من عتمة خيالي
يمسح وراقه الحور. بخدود موالي
ورد وسنديان..... ميخائيل عيد
***
أيام
ذكرك عبالي يا زمان الولدني قطرة ندى مرت ببال السوسني
حدود الدني كانوا بعيني فشختين وخلف ضهري كانت هموم الدني
* * *
ضيع العش وضاع عصفور الهوى وجنت الريح وطير القشات الهوا
ونحلات حاموا عالورود وسربوا رجعوا لوحدن والأمل نرجع سوا
* * *
وبوحن كان البيت بيته. وين صار؟ زار السياج وطار مهجورة الديار
لمين بدو ينفض لوان جوانحه؟ ولمين بدو يتكتك وينقل خبار؟
* * *
وأمي عذكرا هالدني بتعزني وبرجع صغير بحضنها وبتضمني
عم تدفش الأيام تيعودوا الولاد وكل ما دفشت سني تقول السني
* * *
وهاك الصغيرة
بنت جارتنا سمر
عيونا الربيع، جدايلا ضو القمر
كانت الحارة تقول مندورة إلي
وأسهر أنا وهالندر ويطول السهر
* * *
وكانت تجي لعنا وكنا نرتكي
بفيات توتة دارنا ويحلى الحكي
كنا صغار.وكل ما تلاقوا العيون
نكتفي بكلمة: شو باك وشو بكي..
* * *
شو قولكن بيمر بعد ببالها؟
هاك الصبي اللي كان متل خيالها
وبعدها عم تمسح جبينه بالخيال؟
وتتشردق وتمسح خدود طفالها!
* * *
وعالمصطبة طباق الحبق عم يرهجو
وتلاعبن دين الصبايا ويغنجو
وبحجتن كانوا الصبايا والشباب
كل ليلة لعندنا يروحوا ويجو
* * *
متل ليلةصيف ماضينا مرق
وتفتحو ودبلو طرابين الحبق
عشنا ضيوف الدهر ع سفرة لئام
ومن وقت ما قالو كلو شالو الطبق
* * *
لما السفينة بتهجر المرسى
قلوب الحبايب عالبعد تقسى
بينسو البعيد الجار والخلان
وبيضل قلب الأم ما بينسى
حكايات وغناني...ميخائيل عيد
***
أمي وبيي
هيدي الوردة كانت أمي. وهيدي الشجرة كانت بيي.
هيدي لوانن في عينيي. هيدا عطرن بين أيدي
يعيشوا فيي. يحنوا عليي
أحمل شوبن بالصيفية. وأحمل بردن بالشتوية
وبناديهم ردوا عليي.
يرد الوادي : ردوا عليي
اسمع صوتن نبعة ميي تغني وتبكي
طلّع فيها.. ألمح وجهي في عينيها
وألمح وجها في عينيي
أركض فيها وتركض فيي
وأبكي عليهم يرجف صوتي
تميل الوردة من الحنية
تفيي عليي..
انده ردوا.. تغني الميي
اشرب منها وغسل ديي
واغسل همي بالغنية:
هيدي الوردة كانت أمي
وهيدي الشجرة كانت بيي.
ورد وسنديان.... ميخائيل عيد
***
حزن
" إلى التي رحلت ولم تعرف غير الشقاء "
من فوق هالكومة من الأيام
بقعد لحالي كل طلعة صبح
بفتح كتاب الحب والآلام
بحسب حساب خسارتي والربح
وبيكر في بالي شريط العمر :
شلعة ولاد صغار،
فقرا وحفيانين
عم يلعبوا
وشو العمر غير لعبة!
كمشة رماد وطين؟
*
ومتل منجيرة قصب
أو جرح من سكين
سنا الزمن..
أو متل..
لا ما في متل
صوتك الجايي من سنين سنين.
*
والوجه.. قديسة وهالأيدين
خشنين من كتر الضنى وحلوين
نبعين من رقة وحزن
نبعين من لطف وحنان ولين.
*
والعمر طاحونة شقا
والذكريات طحين..
*
ومتل من ليلة شتي
والدرب وحل وبرد
بيطلع خيالك وج باقة ورد،
تضوي الدروب المعتمة
أصحى ع نسمة حب
تجيب الدفا للقلب
تفيق السواقي الغافية
ويخضر عشب الدرب.
*
وبيلفنا الدًخان
وبتنحني عالموقدة
وبتنفخي
وبتدمع العينين
وبتضحكي..
"والنار فاكهة الشتي"
ويا نار حزني دخني
ويا سنين
لا تنشًفي الدمعة
ويا حزن شعلل هالقلب شمعة.
*
وشو النفع؟
عالم وانطفا..
لمً الكدر مثل الصفا
والشمس تطلع بالشقا
والشمس تغرب ع الشقا
ويا قلب: شو ناطر بقا؟
*
ضيًع جراسه الضحك
ونشفت سواقي اللون
والمجد كذبة.. والفخر والعز
شوية جنون ومنفخة
وهالكون طبخة محمضة
والحزن طعمه مز..
من ديوان ورد وسنديان للشاعر ميخائيل عيد
***
دم الأطفال يناديكم
كنتوا عم تلعبوا تركضوا وما تتعبوا
واجت الطيارات وقصفت الطيارات
وهديتوا للأبد وما بقي غير ولد
عم يركض عالطرقات
...
يا ملاعب الطفولة تحولت لمدبح
والحرب المهولة بعدها عم تنبح
ويرتد الصدى من عمق المدى
وتخمد الأنات
...
كان الحلم مزهر وانطفوا الأحلام
وهاك الطفل الأسمر بلا مخدة نام
ترك اللعب ونام ترك الحلم ونام
ودبلت الوردات
...
ما بترد الدمعة جنون المجانين
ولا بتهزم الشمعة زوابع كوانين
لكن عزم الأرض بيقدر يطفي البغض
وتضوي البسمات
...
دم دم دم رح يصبغ العالم
دم دم دم اتحدوا يا أوادم
وانهضوا يا رجال جابهوا الأرذال
واحرسوا الحياة
ورد وسنديان ... ميخائيل عيد
***
فرحانة
فرحانة كتير فرحانة. والأرض طيور وغناني
ع العين قلي بلاقيك. وع العين ولفي لاقاني
*
مليت الجرة وسقيته. وقلبي بالمي خبيته
يا ريته شربه يا ريته. حتى ما يعود ينساني
*
وقلي وينا السهريي. سكت وحكيو عينيي
ما في آه ما فيي. أتذكر شو حاكاني
*
وعن عيني قال عن عيني. ما بعرف تخمين جنيني
وقلبي يضرب ع الهيني. متل البلحب سكراني
*
وقلي بكرا عشيي. بيطلب أيدي من بيي
عجل يا بكرا شويي. رح انتظرك سهراني
*
حكايات وغناني.... ميخائيل عيد
الصفحة الشخصية للدكتور جودت ابراهيم