طقمي الوحيد
2023.12.20
أسعد السبعلي
(حكاية هالطقم صحيحة، زهقت منو وزهق مني، وما كنت اقدر غيرو.. الحالة تعبانة معي كتير.. ومره كنت لابسو سمعت كلمة من موظف كبير شايف حالو بطقمو قال: "لازم الدولة تشتري طقم السبعلي وتحطو بالمتحف."
عتّق عليك العمر.. يا طقمي الوحيد..
انحلّ خيطك، والفرح بعدو بعيد
فكري لهمني للمتاحف اعرضك
بيشتروك.. وبلبس بحقك جديد..
ولو في بَدل عنك.. عرضتك من زمان
سَيرك منسّل، وجّك مغبّش كمان..
صارت الرقعات فيك مرقّعا
تفيّق معي، لونك الأصلي كيف كان!
لو جيت تا اكويك ما بتحمل كوي
نازل خميره متل تين المستوي!
وما فيك يشفع فيك غير كلمة نضيف
ونضيف نوعين المعاني بتنطوي!
تنية جْريك بتشبه سنان المشاط
يا رفيق عمري عم تفرّم من جديد؟
وقد ما تبكّل عا خصرك هالقشاط
دابت عا كتر الشدّ زردات الحديد!
مورّمه ركابك متل بطن البريق!
هيئتك منفوخ منّي يا رفيق
ان ردّيت ايديي لاورا.. مش كبريا
صرت مهري.. بخاف تقشط عالطريق!
صرت "انتيكا".. وصورة عمر فيك
ليش الحكومه شالتك من بالها..
ضروري لمتحفها يا طقمي تشتريك
رمز الأديب بعهد إستقلالها!"
....
أسعد السبعلي، منجيرة الراعي..
الصفحة الرسمية للشاعر أسعد السبعلي