عطر جوعان
2023.05.03
محمد قرفول- فينكس:
سهرتي وصار العطر ع مخدتك جوعان
مشتاق خدك يجي ويزيد تعطيرو
ضلي حنين ودفا ع سريرك البردان
يعطيه جسمك دفا تا يعرق سريرو
ويفلش حرامو الزهر عا جسمك الشعلان
الرمان عم يشتهي ينامو نواطيرو
يشرب دموع الندي تا يرتوي الرمان
وعناب يشرب معو يسكر بتأثيرو
عا صدر مقلع عاج مطعّم بمرجان
يرشح جمال وندي يسقي عصافيرو
وتا يكبرو عا مخدة الألوان
ينقودو حبوب الحلا بالسر ويصيرو
طيرين كبرو سوا عا فرشة التحنان
يزيحو قميص الغفا والنوم ويطيرو..!