ليش تركت الليالي و الحروف؟
2022.12.24
هاني حسن- فينكس:
ليش تركت
دنيا الحروف ومارجعت
ع البيت؟
يمكن لأن حسيت
ماعندي قصيدة
ليش تركت كل الليالي
وساعة ال حبيت؟
يمكن لأني هيك
ماعندي غصن
إنشر عليه الروح
لو حنيت
ليش حذفت كل الأماني
وحلم ماخليت؟
يمكن لأني وعيت
بعروقي بلد
عايش على ال ياريت
ليش كسرت عينيك
من أي أفق والنظر مامديت؟
يمكن لأنو كتير محدود
الأفق
العقول كلها زيت
ليش مسحت بصمات
قلبك والقصيدة محيت؟
يمكن لأنو الناس فهموني غلط
لما المحبة نعيت
ليش دهنت جرحك مطر
وملح البحر عاديت؟
يمكن لأنو الجرح
بتيابو إنكوى
ومن الملح... مليت