العمر ماضي
2022.12.04
فينكس- محمد قرفول
لهفي على ايام قضّيتا معك
لا صوت منك يوصل ولا اسمعك
بكرا بعد م تروح ايام الشباب
دخلك الباقي من العمر شو بينفعك ؟!
بكرا بعد م تروح أيام الشباب
ويصير ناطرنا الخريف عْلى البواب
ما عاد ينفعنا بعاد ولا قراب
و غير الندم والآه ما بيبقى معك
و يمرق ع عينينا شريط الذكريات
نبكي على احلام ضاعو بهالحياة
و نقول يا أيام من بعد اللي فات
شو ضل باقي يا عمر تا رجعك؟!
بآخر طريق العمر ناطرنا الرحيل
يا عمر كنت كتير ع العاشق بخيل
رح ترتمي ع الأرض يا شلح النخيل
و ما في حدا رح يسألك شو وقعك
و الضحكة اللي عرفتها بأول صباك
و ايام عشتا يا حبيبي عا هواك
الفرح باعك والوجع منو اشتراك
و تبكي لحالك من جرح بيوجعك
العمر ماضي يا حبيبي والزمان
ما بيترك الانسان لحظة في أمان
رح يقطفك يا ورد من قبل الأوان
و عا مخدة النسيان يرجع يزرعك
لما على باب النهاية يودعك..!