دمع تشرين
2022.10.17
فينكس- محمد قرفول
حبس الدمع تشرين
تشرين شو صابك؟!
عودتنا من سنين
تبكي ع أحبابك
رح يوصلو كوانين
وفاضيي جيابك!
كان المثل مضروب
بعنبك التشريني
خمرة حنين يدوب
وتزهزه سنيني
صار الفرح مصلوب
ع خشاب عطشانين
شو قصتك تخمين؟
ما بتلبس تيابك
تيابك غيوم السود
صدرها معبا
لما علينا تجود
ونصير نتخبا
يميل الطقس ع برود
وتغرًق ترابك
يا ربنا المعبود
منركع على بوابك
نصلي مع مصلين
يا شتي تشرين
ريت الصلا جابك..!