شاعر ومنبر بالسما
2022.09.15
رثاء الصديق الشاعر سليمان كاسر غانم
فينكس- محمد قرفول
تخمين
عملو بالسما منبر؟!
وطلعت
حتى يسمعو حروفك!
حروفك عبير المسك والعنبر
طافو من فكارك
على كفوفك
وصار مجد الحرف يتعطر
يدشر كمامو ويطلع يشوفك
و الورد
صار بريحتك أخبر
فصّل زرارو مطابقة وصوفك
يا بو علي هالموت شو بَكّر
خطفك
وما كملت معروفك؟!
رفوف المكاتب خاطرا تكسّر
رحت وتركتا جايعة رفوفك
طلعت ع الجنة
والمقدر
الملايكة ع المنبر ضيوفك
جمعوا الحواري
وهيبة المحضر
شي هلل وشي زغرد وكبّر
ع المنبر اللي ناطر وقوفك
وهونيك عا ضفة نهر كوثر
عا جيّتك كل الورد زهّر
سكبت القصايد
مرمر وجوهر
وتركتنا ع الأرض نتحسّر
وننطر يفتّح ورد ت نشوفك