اسكبني قوافي
2022.08.19
محمد قرفول- فينكس:
نشّف خيالي يا وحي اسقيني
غير دمعك ما بيرويني
عطشو القوافي والحرف جوعان
والفكر غافي
والورد دبلان
دخلك قوافي بكر غنيني
اسكبني على خد الورد ألوان
لا تتركو أصفر بتشريني
من بعد ما كان الربيع وكان
يسرق بهجتو من تلاويني
اسكبني بِموسيقا الشعر ألحان
بحة كمان تقول يا عيني
والورد يرقص
والعطر خجلان
يرش حالو عا بساتيني
والقلب يتنقّل على الأغصان
وبقلب فلة يقول غفّيني
يغار البنفسج
يشهق الرمان
يرجف برد ويقول دفيني
وضمو بلهفتي عا صدر دفيان
يقلي دخيلك هون خليني
حد شامة للحلا عنوان
تنعس عيوني
والنعس سلطان
اتركني ع صدرك
نام كيف ما كان
بشراشف التحنان غطيني