(في القصيدة أسماء لأماكن ودروب معروفة في سبعل..)

"الضيعه اشتقنا عا ناديها

وعا سهريات لياليها..

عا ساحتها، عا كنيستها

عا سكملتها، عا كركتها

عا معاصرها، عا خوابيها..

ناطور الضيعه اشتقنالو

عا دبّوسو، عا شروالو

ما بيسترجي راعي يخرّب

وعنزه صوب الزرع تقرّب

أرزاق الضيعه حاميها..

للتعّريقه وصلب القيمي

بريق الفخار البلخيمي

وجدّي من كاسو يسقيني

يغمز ستي عالقنّيني

فضيت ، تا تروح تعبّيها!

عا غيّاب الضيعه اشتقنا

ونار الفرقه عم تحرقنا..

الجلسه معهن بس يطلّو

بتسوى مال الغربه كلّو

والفرحه تجّن لياليها..

وع "كوع طرطق" حلوه السهره

زهره وغصن وغصن وزهره

ومكاري معجوق بموّالو

تفجّ الليل غرار بغالو

وعين الغفياني يوعّيها..

من "شير الأحمر" "للحرشي"

انت وهالوديان بتمشي..

عا "الدقرين" و"عبرا" حوّل

و"الزيره" فيها لا تطوّل

بخاف تشفلك حيّه فيها!

بتشوف بدربك لوسّيا

تحت اللوزه عم تتفيّا..

وهالعم تغزل بالدكاني

كان معها هَبصه حرزاني

بفردة كلسات تخبّيها... 

....

أسعد السبعلي، "طل الصباح"..

وفي الصورة السبعلي حجراً بين الأب حنا الحاج والنحات السبعلي العالمي طوني فرح..