رح ترجعي
2022.07.29
محمد قرفول- فينكس:
قديش فيكي تعذبي فيي
وقديش عطرك
رح يضل يفوح ؟!
ووردات خدك يشتهو ال ميي
والشوق نبع
بجرحنا المفتوح
وقديش
فيكي تطولي درب الجفا
وتخمني إنو العشق
وهجو انطفا
بكرا ع جمرو
بترجعي تمشي حفا
والندم ع.شفافك
همس مدبوح
وبترجعي تْلمّي نهيدك
ع. الهدا
ودمعك يرشلّك على جرحك ندى
وبتعرفي إنو يا روحي
ما حدا
بيروي ربيعك
من بعد ما روح
ناطر أنا
ورح ترجعي ليي
ويفتّحو زرارك ع. إيديي
وكلما بالبلوزة المستحيي
زر انفتح
منّو بتشهق روح
ويرجع حلاكي
ع. الدني ويفوح..!