بلادي الخضرة روابيها
2024.04.17
محمد قرفول- فينكس
يا بلادنا الخضرة روابيكي
والخير كلو في بَوَاديكي
مهما بحلاكي خرّب الاجرام
بيضل رب الكون حاميكي
كرمال الله تفرحي يا شام
لا تدمعي، ما بيلبق عليكي
للكون انتي مصدر الالهام
التاريخ كلو تحت إجريكي
ياما وياما بالفكر أعلام
فكرن تعتق في خوابيكي
ام الحضارة، وشو مرق أقوام
والأبجدية بعض ماضيكي
من وقت ما قدموس منك عام
بمراكبو، وودع شواطيكي
خط الحروف وكتبت الاقلام
والشعر زهّر من قوافيكي
أحمد نبينا ودينا الاسلام
ويوسف وموسى قدّسو فيكي
وعيسى المسيح ال بعد صلبو قام
فادي الخلايق كان راعيكي
وكل مين صلالك وزكا وصام
يدعي ل الله الخير يعطيكي
رح نحرسك مهما قسوا الايام
بتبقي يا سوريا ال ما بتنضام
ارضك عزيزة ومنية الأحلام
بولادنا وبالروح نفديكي..!