يا رب نجينا
2024.09.19
محمد قرفول- فينكس
يا رب تا نحمل ما عاد فينا
الفقر عشعش في بيوت الكل
والدمع نشف في مآقينا
وكل لحظة عايشينا ذل
لا فيه كهرب تا يضوينا
والغاز موسم من مواسم قل
مننطر رسالة بموعد تجينا
وهلة قمر جرة الغاز تهل
والصيف حرو الويل ساقينا
(والبق) مص بدمنا ما مل
لا مروحة تلطف ليالينا
وتا نخلص من البق نشعل (جَلْ)
واسعار متل الجمر تكوينا
وتجار ما بترحم ولا بتكل
مين اللي بدو يشفق علينا
بكرا البرد بعضامنا شي يغل
مازوت ما في تا يدفينا
وزيتونا قطعنا شجر ما ضل
كيف رح نقضي أماسينا
مين ال.بأيدو حل يعطي حل
بدنا جراحة تا تداوينا
تنهي الفساد ببلدنا وما نفل
ونرجع سوا نعمر مبانينا
نشبك ايادينا، الفساد نشل
ونْرجّع البترول يكفينا
عم يسرقو خيراتنا عن حل
المحتل فات بقصد يأذينا
وهي عادة الغدار والمحتل
ولادنا هجرو موانينا
ولا ضل عنا زنبق ولا فل
ونحنا تمسكنا بأراضينا
سكبنا الدم بأرضنا ت.تغل
غلت محل غطى روابينا
من بعد ما كانت خضار وطل
ابن البلد هاالكان يحمينا
ونحميه كفرنا وعلينا دل
صعبة علينا ال.معهن ربينا
يهينو كرامتنا وبقلبن غل
دخلك إله العرش نجينا
شقيت بلدنا كتير وشقينا
وصرنا بقلب بيوتنا ننذل!