عش دبابير (موشّح زجلي)
2024.09.16
محمد قرفول- فينكس
كلما عيونك ندهوني. روحي بتصير
ترقص متل المجنونة. ع حفاف الشير
حكمتي عا قلبي عرفي. مع شنق وصلب
خايف، ناطر بالغرفة. راقب هالدرب
جيتي من الباب الخلفي. وما في نواطير
تركتلك درفة بابي. مردودة رد
حتى ما يشوفو حبابي بساتين الورد
صيري مرة كذّابة. وقوليلن برد
وغلّي اتدفي بعبابي. ادفى بكتير
حطّت اصبع عا تما. قالتلي هس
من خوفا توعى اما. وال بي يحس
قربت عليها شما. شمة ع اللس
فار عليي من كما عش دبابير
بين جنينة وجنينة. ضيّعنا الحب
ما بين القلب وعيني. مفتوح الدرب
تبقي مرّي زوريني. عطشان القلب
تكوني خمرة وتسقيني. الخمرة تقطير..!