صبح فيروزي
2024.02.26
محمد قرفول- فينكس
كلما الصبح غنت إلِك فيروز
يصير اللحن يرقص حواليكي
ويفتّحو بخدِك زرار اللوز
والنحل يجني من روابيكي
والليل يشلح شرشفو المدروز
نجوم،
وتتفرفط ع ايديكي
و تالصبح يطلع من عراوي بلوز
فكي زرار الزنبق المحجوز
ت الضو يطلع من عراويكي
يا حلوة الحلوات ما بيجوز
تِحبسي كل العطر فيكي
وتجوعي الوردات ع المكنوز
فصل الربيع مْشوّق عليكي
بلوزة تخبي تحت منها كنوز
لولو وعقيق زمرد وفيروز
وطيرين ربيو ع المحبة جوز
شاحت عيونن عا شبابيكي
شكلن رح بيتمردو عليكي..!