(صوت الناس).. قصيد
2024.09.02
محمد قرفول
الشاعر إذا ما بيعرق جبينو
ويسكب عا وراقو من حنينو
ما فيه يكون شاعر بالصدارة
إذا ما كان مع شعبو عنينو
ضروري يكون في عندو جسارة
يحكي كلمتو ويرفع جبينو
حتى يضل للكلمة منارة
وحتى الموهبة تبقى شبينو
وحروفو تنتشر في كل حارة
يضوي عا وجع مش آلفينو
ما يفزع من ظلم بعض الإدارة
ولا بعض الوجوه ال.حاكمينو
رئيس بلادنا أعطى الاشارة
نضوي ع.الفساد ال.عايشينو
ونكشف هالوجوه المستعارة
وعن اللي انسرق واللي سارقينو
حتى ترجع بلاد الحضارة
منارة وبهداها يستعينو
شباب بلادنا عندن مهارة
يبنو وطن انتو مهدمينو
يا شاعر قوم من قلب المغارة
وقف مع شعب محترق دينو
حاجي ع.الغزل تحكي بشطارة
الغزل ما قَرّص الخبز بعجينو
احكي ع. الشباب وعالعذارى
ع.بي مْنُشَفْ الدم بوتينو
ما فيه يورّث ولادو خيارة
ما ضل فرنك بشمالو ويمينو
ل.غيرو بكل حارة في عمارة
وهوي عمارتو همو وأنينو
خسارة عيشتو صارت خسارة
إذا ع.السوق رَاح يعمل زيارة
قلبو بيحترق من دون نارة
ع.جرحو يعض يا رزاق عينو..!