الفنان عصمت رشيد كما يتحدّث عنه جاره
2024.12.02
حميد حمدي
كان بيت المطرب عصمت رشيد بالجسر الأبيض جنب محل زياد سحتوت تبع الورد... وكان بيتنا فوقن بالطلعة.
كان هو زاوية الشارع... مين مامرق من جنب البيت يقولوا هاد بيت الفنان عصمت...
عصمت كانت شهرته كبيرة بآخر الثمانينيات لدرجة أنه لو لمحته لابس الروب ديشمبر الخمري المخمل تبعه قول لرفقاتي شفت اليوم عصمت رشيد...
كانت غنية ليه تشكي من الدنيا ياورد؟ غنية مكسرة الدنيا.
كان ستار سوريا الأول وغنى للمنتخب: دقوا عالخشب!
عصمت رشيد كان برفقة مروان حسام الدين هنن الشامي تبع أبي وأمي وعماتي وعمامي... مروان حسام الدين لما يعمل حفلة بالشيراتون براس السنة 1985-1986 مافي محل توقف... مروان هو قدم أصالة للجمهور لما كانت صبية صغيرة.
مروان صاحب أغنية يا ميمة..
لما طلع جورج وسوف... وكان ولد صغير عمره 16 سنة... يلي قدمه للمسرح والجمهور هو المطرب عصمت رشيد... لكن مين بيعرف هي المعلومة؟ ماحدا...عصمت تبناه بوقتا وآمن انه مطرب موهوب.
جورج وسوف نفسه لما نجم كتير لاحقا... وقف عالمسرح وغنى ليه تشكي من الدنيا ياورد؟
كان بوقتا جورج وسوف هو الشامي تبع جيلنا... قام سألوه المايعين تبع جيلنا بوقتا: ليش عم تغني غنية لفنان أقل منك بكتير؟
"لأنه كان عصمت بقا هون اختصاص التلفزيون السوري الفاشل بالتسويق وصار مطرب محلي، ونزلت شعبيته متل كتار من المطربين تبناهن التلفزيون وراعي الفن الأول ونزل اسهمن: موفق بهجت، فؤاد غازي، محسن غازي، مروان حسام الدين، نعيم حمدي.... أصالة طبعا نفدت منهن وصارت ستار مع انه حاولوا معها ببداياتها، عصمت اختار مصر ومانجح هونيك، بينما جورج راح لبنان، وصار المطرب العربي الأول".
جاوب جورج بوقتها أنه الغنية الحلوة مالها كبير وصغير..
رحل عصمت رشيد من دون ضجة، كنت أتذكر لما كنا صغار وروح لشوفه طالع من بيته ونقله باي، بجد هو بينزل من بيته كان كأنه برينس... كان مشهور كتير... لدرجة يتخبى من المعجبين...
هلأ لما نقول مات عصمت رشيد؟ ماشفتله ولا حدا نعاه أو ذكرله غنية.