سنة جديدة
2026.01.01
محمد قرفول
جايي سنة جديدة
ومضيّعا العنوان
يا سنة لا تزيدي
مْن الشقا ألوان
ما ضل عنا دموع
وحق النبي يسوع
دبنا كأنا شموع
صار الحجر موجوع
وعاف الزهر نيسان
شوفي بساتين الفرح
يا هالسنة شو صابها
بْكلْ دار في قلب اندبح
يبكي على غيّابها
وعم يشحد النسيان
عتباتنا تبكي قهر
نسيّت الضحكة من دهر
ما عاد عم ينبت زهر
لا ليلك ولا بيلسان
وبوابنا اللي مسكّرة
ما ضل عاشق ينطرا
لولا انفتحت يا ترى
رح يدخلا انسان؟!
كل مين وحدو بهالدني
يعض ع جراحو
أنات، صدرو يغتني
وينوح ع الراحو
غلتو أحزان
كاااان الزمان...
ووقت م كبرنا
ما ضل شي يجبر خواطرنا
مننطر، وما منعرف شو ناطرنا
ونقعد ونبكي ع الزمان ال كان
الله يرحمنا
ويرحم اللي كان.....!