ناطرا حروفي
2024.11.28
محمد قرفول
بعرف يا سمرا
ناطرا حروفي
وبتفرحي لمّا بتقريني
تلمي غلال
وبيدر كفوفي
يقطفلك العنقود تشريني
وبكل حبة شوق
بتشوفي
لون الشمع دايب
متل عيني
يقطّر دمع
ورموش ملهوفي
تعبيلك الدمعات قنينة
ونشرب نخب وردات
مضيوفي
من نحل عبّا جرارنا مونة/ي
وصب كاسين وأنا وحدي
وحدة إلي
وانتي إلك وحدة
طيفك معي، وخيالك،
ضيوفي
واشرب من الكاسين
نقدي ودين
تقولي يا ولفي
كترت ديوني
وحتى يا حلوة
ديونك توّفي
اسقيني من شفاف الحلا شفة
نسكر سوا
وكاساتنا نقفّي
وبسامحك يا روح بديوني..!