اللي ضل من غيبتكْ
2024.09.03
محمد سعيد حسين
ما ضلَ شي مِن غَيْبْتِكْ
غَيْر الْكأنّو رحْ تجي
وْغَيْر الْكأنّو..
صار مفتاح الفرَحْ
بـِ جَيْبْتِكْ..
ما ضلَ شي من غيبْتِكْ
غَيْر الْكأنّو رح تجي
ورَحْ تنْتِلي سْلال السّما
غْناني، وقَصايِدْ شارْدي
وْرحْ تسبقِكْ عَ الشّام
ناعُورة حَمَا
وْتُنْطُرْ عَ بابِكْ
ساجْدِي
قدّيْشْ قولِكْ رحْ تْضَلاّ مكركبة، وملَبّكي
من هيبتِكْ..!
قلّك شو لازِمْ تعْمَلي تا توصلي؟!!
قومِي فْتَحي شبّاك أحلامي وتَعي..
وْ لا تِسْألي
في حدّ بالي بَيْتْ عمرو بأوّل
الْحيطانْ
عَمْ يرْسُم الْكَرْم الّلي بَعْدُو
ما حِلِي
وْحالِفْ ما بِيْدُوق الحلا
تا تِرْجَعي..
وْ في حَدّ بَيْتي سنْدْياني معَتّقة
باللاّوعي
كل يَوم بتْهَجّي تفاصِيْلِكْ
مَعي
وْبِتْصيْرْ تكْتبْلِكْ رَسايِلْ
فاضْيِي
بحْروْف بلّتْ رِيشْتا
من مَدمعي..
وترشّ "دوّام" الأمل
عا جوع هالبيت اللي ناطر جيّتك،
من شي حلم سكران
بعدو ما وِعي
ولما بتِصحى سكرتُو من غَفُوتا
بِصْحَى معا،
وبْحَركِش بْهالشّمس تا تُوعا
بِمْسَحْ بْشال خْيَالِكْ دْمُوعا
وبْهَدْهْدا وبْضمّها وبْنام
وبْعزّ نومي بحْلَمِكْ:
بْشوفِك عم تفلّي القصيدي مْن التّعب
وبْشوفْ وجّك ضوّ عَم يغمُرْ حلَب
وبشوف تمِّك طالع مْن النّاي
عَمْ يفرُش بْحُوران موّال القَصَبْ
وبِلْمَحْ خْيالِكْ بالحلم
متل الْ كأنّو مَيْدَنِي من اللادقيي
مْسافْرا عَ كْرُومْ حمْص تْقَطّفْ سْلال العنَب
وبْشُوفْ صدرِك دَالْتَيْن جْرَاسْ
حاملهُنْ صَليبْ الرّبّ عَا مدخَل كَسَبْ
وبْشُوفْ طَرْطُوس البحرْ
بِعينْتَينِك هالخضرْ
عمْ تزْرَع غْنَاني الأمَلْ بي ادلِب الخضْرا
وجْوانِح الفينيق عَمْ تنْفُض رْمَادْ الوجَعْ
وتْبِلّ ريْشَاتا بْحلمْ بُكرا
وْنصحَى ـ أنا و الحلم ـ ونغنّي:
ما ضلّ شي من غيبتِك
غيْر الكأنّو رحْ تِجي
وْغير الكأنّو صار مفتاح الأمان
بْجَيْبتِك..!
كتبتا لما كنا لسة عم نضحك عحالنا بالأمل