ماصْحِيتْ بعد من الحلم
2023.12.07
علم عبد اللطيف- فينكس
ماصْحِيتْ بعد من الحلم
وبيعود يكذّب عليّي.
شو حلو حَكْيِ الحلم
مصدَّق إنّي مْصَدّقو
معليش.. كذب الحلم غيّة.
يمكن انا عرفت الكذب
مو بس عليك.. عا حالي..
رِحتْ عنّك.. من عتم قلبي
ل سْواد عينيي.
لو مرّة وحيدة ياحلو
لما تجي وتروح
تشوف مني الروح
كيف بْتِتْبعك.. تِرحل معك
مامرّة بودّعا.. وبقول
يمكن تجي جايب صور
أو متل طلّات القمر
القمر بيألّف شرر
بيبدع صور يمكن كذب
بس كتير ع قلبي الكذب
لا تفكّرو شويّة.
وبقول.. ياما ترك
عندك كلامي.. وحذّرك
ياحلم.. صدّق بعرفك
إصحا بقا تا خبّرك
كل عمري اسمعك
مو انا المغشوش فيك
يا روحي..
انت محظوظ فيّي.