جوري مدبوح
2022.06.14
محمد قرفول- فينكس:
داب الأحمر ع شفافك
جوري مدبوح
وليل ال مرخي ع كتافك
مشلح مشلوح
سليتي سيوف الحدة/ي
وهدرتي الدم
نسيت النومة ع مخدة
من كتر الهم
حسيت الورد مندّي
صار قلبي يشم
بين الوردة والوردة
ع العطر يسوح
اشتقنا نشوفك تتمشي
ع دروب العين
اغمز غمزة من رمشي
لعيونك دين
تدوبي عطر وتنرشي
عا هالحلوين
وتكون رموشي مرشّة
وعطرك مسفوح
الريم اللي بمرجي غلّت
حاميها الرب
سكبت من عطرا وملت
بجرار الحب
لما ع السهرة طلت
دقات القلب
نزلت ع الصفر وعلت
فوق المسموح
بين شفافك وشفافي
دابو النهدات
لا ترتبكي ولا تخافي
اجني العسلات
يا حلوة الحب الدافي
بدّو بوسات
تشرب خمرك ع الصافي
وتغذي الروح..