ع ضفة وطن
2022.05.23
هاني حسن- فينكس:
ع ضفة وطن
عم يلعبوا بالعشب
هالطفلين مبسوطين
عم يحلموا
بكرا أكيد بيكبروا
وبتصير ضفة هالوطن
مشوار عمرو سنين
مابيعرفوا
شو بعد ضفة هالوطن
مابيعرفوا لوين رايح هالنهر
مابيعرفوا من وين
بكير حتى يشربوا
بعدا الشمس ما وعيت
من النوم ع التقنين
بكير حتى يسألو وين الخبز
بكير ما اسمو خبز
لسا كفوفو صغيرة
حبة قمح بالطين
بكير حتى يدوق جمرات الفرن
ويصير قلبو ينشوي
ويتمنى من كتر الوجع
يرجع لعمر طحين
بين الحقيقة والخيال
بيلعبوا طفلين ع ضفة وطن
والليل ناطر ينعسوا
ليسجل بإسمو صدى الضحكات
ذمة ودين