سهران
2022.05.21
علم عبد اللطيف- فينكس:
سهران تا يهرب من حكايات الأمس
بلكي السهر يلهي
مَلّ قلبو من الهمس
وبقي الليل يهمسلو
بغفوتو
حكايات الأمس ياصاحبي
نِتفة باقية بالقلب
تِنضح ب قطرة
من الوِنِسْ.
سهران...
تا يهرب من حكايات المنام
لو فيه ينسى بسهرتو
حكايات عام
لو فيه النعس
يجرّ عينو ع السلام
كان الغفا بيقول
لحلمو انتظر
الليلة بلا ما تِتْعِبو
ارتاح عنّو شوي
وقوم نام.
سهران..
تايبعّد عن عيونو الغفا
سْراج الضّو
شرب زيتو وانطفا
ياريت الليل يحكي ياصبح
يهمس بإدن العتم
زوّدتا... كفا.
سهران حتى الصبح
ياصبح اتركو
نهدات صدرو
فوق صدرك يتّكو
يمكن عرف حكي العيون
شايفهن بكو
دموع جَرحو القلب
وسبقوه..راحو
يشتكو
قال القلب فزعان
بلكي بالعتم شي ليلة هرب
ياريت لو تقدر
بإيدك تمسكو.
سهران..
حتى يْفيق من وهم
الغرام
يذكُر حلم
قال شافو بالمنام
معليش يا نوم الهنا
لو كان صام
القلب ليلة سهر فيها
وقام نام
بلكي الحلم بيجيه
حامل مونتو
ويوقَف على إجرين..
وتقول قام.