معركة "وادي عين فتوح" في الأدب الشعبي
2022.04.13
في مثل هذا اليوم 13 نيسان من عام 1950 فاضت روح المجاهد الشيخ صالح العلي إلى باريها، و الشيخ صالح العلي غني عن التعريف.. بمناسبة الذكرى الثانية و السبعين لوفاته ننشر "قرادية" قيلت عقب آخر معاركه مع الاحتلال الفرنسي، نعني معركة وادي "عين فتوح" في ريف جبلة، مع ملاحظة أننا ننقلها عن صفحة الأستاذ أسامة حسين:
بالله سمعلي ها الغنية
عا حملة (عين الشرقية)
الفكرة طلعت من باريس
قالوا (بشراغي)عاصية
الحملة طلعت حتى تجيب
الشيخ صالح قبل ما تغيب
جايي بتنظيم وترتيب
والموسيقا العسكرية
بالاول عملوا تمهيد
بالمدفع كان التهديد
ضربوا (بشراغي)من بعيد
وانقصفت بالمدفعية
لما ضربوا (بشراغي)
تسمع للطوب يناغي
النيجر كان فيهم باغي
قال بدو ضربة قاضية
بوقتا لما صار الضرب
العالم تركض شرق وغرب
فوق الدرب وتحت الدرب
الشاطر لاقى قرنية
الحملة طلعت فوق النهر
بفكرا لح تقهرنا قهر
يا شيخ حيدر بالضهر
ترميها بمية بلية
هون اصطفوا ها الثوار
من(درمينة للفوار)
وكل مين عا رفيقو دور
وعملوا خطة حربية
والشيخ صالح ورجالو
حوالي منو وقبالو
صاحب رأي بأفعالو
وعندو همة عالية
لما وصلوا عا الوادي
نار وشعلت بفؤادي
(سليمان عيد)صار ينادي
يا ضابط لك مني هدية
ولما وصلوا للحارة
(يوسف عيد)اجاهم غارة
وشقلبهم بالحيارة
وهادا بعدو من الألفية
ولما وصلوا(لعين فتوح)
هون صار طلوع الروح
روح العزيزة بتروح
(..............)
(صالح يا ضنى ميهوب)
صاحب شوفة بالحروب
بالمرتيني خمس ضروب
ما فيهم طلقة فاضية
(عبود بن مرشد شيحا)
قال طلقتو مللي ريحا
عمل فيهم دبيحا
وكانوا عنتر عبسية
ولما وصلوا للعامود
تتسمع ضرب البارود
فليحييا (حبيب محمود)
مقاتل بألف وخمسمية
ولما وصلوا لنفس الحار
هوني اصطدموا بالثوار
صارت دوكة وضرب حجار
بين فرنسا والثوار
(يوسف )عيط يا (جبور)
هلق بدي تكون حضور
أنا عملتلك الفطور
وبدك تعمل عصرية
و(الشيخ صالح )مستحضر
بخرطوشاتو متذنر
ناطر تا يمر النيجر
حتى يعملوا ضهرية
متزنر بتلات صفوف
صوت المارتيني معروف
ما منقوس حتى نشوف
لحقتهم عا(نبع المية)
نطرنا تا وصلوا عا العين
وصاروا عا مسافة قوسين
(الشيخ صالح) قوس ضربين
من المارتيني الالمانية
بين الحملة والثوار
علق الضرب وطلق النار
بعدا تفرج عا العسكر
وبواريدو المرمية
والناس بترمي جلاميد
الصخر بتقتل ما بتحيد
مبارك يا(بيت علي عيد)
ها الغيرة وها الحمية
(بوادي فتوح) انحصروا
الحملة فشلت ونكسروا
بين البلان انتشروا
قتلى بنص البرية
من أصل المية وعشرين
عدينا القتلى خمسين
الباقي رجعوا مهزومين
من ها الدوكة القاسية
تركوا سلاح وتركوا عتاد
وحلفوا انا ما بتنعاد
فتكروها لعب ولاد
بس طلعت ثورة داوية
الوقعة كانت حرب ضروس
دوت أخبارا بطرطوس
وبالشيخ بدر وبالقدموس
وبجبلة وباللاذقية